Dy sondazhe të reja të publikuara në Francë e pozicionojnë lideren e partisë së ekstremit të djathtë Tubimi Kombëtar (RN), Marine Le Pen, si kandidatin kryesor për të fituar zgjedhjet presidenciale të vitit 2027, megjithëse ajo ka marrë një dënim në apel për keqpërdorim të fondeve të Bashkimit Europian.
Rezultatet e sondazheve, të realizuara nga Ifop për LCI dhe Le Figaro, si dhe nga Toluna Harris Interactive për M6 dhe RTL, tregojnë se Le Pen pritet të kryesojë raundin e parë të zgjedhjeve dhe të dalë fituese edhe në balotazhin e planifikuar për më 2 maj 2027.
Institucionet që zbatuan anketimet e nënvizojnë se këto rezultate reflektojnë vetëm situatën aktuale të elektoratit dhe nuk paraqesin një parashikim të saktë të rezultatit përfundimtar, pasi situata politike mund të ndryshojë ndjeshëm deri në raundin e parë të zgjedhjeve, që do të mbahet më 18 prill 2027.
Le Pen forcon avantazhin
Nga sondazhi i Ifop, Marine Le Pen del me 36% të votave në raundin e parë, një rritje në krahasim me 32-34% që kishte regjistruar në muajt e kaluar. Në të njëjtën kohë, asnjë nga rivalët e saj nuk arrin të kalojë pragun e 19% të votave.
Edhe sondazhi i dytë jep një pasqyrë të ngjashme, duke e vendosur Le Pen në vend të parë me një diferencë të dukshme ndaj kandidatëve të tjerë.
Anketimet u kryen pas vendimit të Gjykatës së Apelit, e cila konfirmoi fajësinë e Le Pen për keqpërdorim të fondeve europiane, por gjithashtu uli periudhën e ndalimit të saj për të kandiduar në zgjedhje. Pas këtij vendimi, liderja 57-vjeçare e Tubimit Kombëtar ka konfirmuar se do të jetë pjesë e garës për zgjedhjet presidenciale të vitit 2027.
Kush mund ta sfidojë?
Sipas sondazheve, Marine Le Pen do të fitonte edhe raundin e dytë të zgjedhjeve, pavarësisht nga kundërshtari i saj.
Rezultati më konkurrues përballë saj e ka ish-kryeministri francez Édouard Philippe, i cili konsiderohet si rivali më i fortë në balotazh. Në të njëjtën kohë, Le Pen pritet të ketë një epërsi edhe më të madhe nëse përballet me ish-kryeministrin Gabriel Attal ose liderin e së majtës Jean-Luc Mélenchon.
Nëse ky trend vazhdon të konfirmohet edhe në muajt në vijim, Marine Le Pen do të hyjë në garën për presidencë si kandidate kryesore për të udhëhequr Francën pas përfundimit të mandatit të presidentit Emmanuel Macron.
