Një incident tragjik ka tronditur qytetin e Shkodrës këtë të enjte.
Një burrë 62-vjeçar, i njohur si Shqefën Ziqi, ka qëlluar për vdekje gruan e tij, Bardhe Ziqi, e cila ishte 55 vjeçare, vetëm disa metra larg dyqanit të familjes, në lagjen “Mark Lula”.
Familjarët e çiftit pohuan në media se nuk kanë pasur tensione mes tyre, duke e përshkruar familjen Ziqi si një çift të sjellshëm dhe pa probleme.
Kushërira e të dyshuarit, Zojë Nika, deklaroi se nuk ka dëgjuar kurrë debate ndërmjet çiftit dhe se ngjarja e sotme ka qenë një goditje e madhe për të gjithë.
“Njeri shumë i mirë, edhe gruaja. Në këtë lagje, të pyesësh cep më cep, nuk ia di kush një fjalë të keqe asaj gruaje. Ne na vjen shumë keq. Të dy kanë qenë të mirë. Fat i zi. E kam kushëri, edhe për gruan kam shumë respekt, sepse ka qenë grua e urtë. Debate kurrë s’kam dëgjuar. Kanë shkuar shumë mirë”, shprehet ajo.
