Gruaja e Altin Hilës, i cili u ndalua gjatë protestës të enjtes para Kuvendit, shprehu shqetësimin se bashkëshorti i saj është arrestuar padrejtësisht për shkak se protestonte për shëndetin e fëmijës së tyre.
Ajo njoftoi se është detyruar të braktisë punën për t’u kujdesur për fëmijët, pas arrestimit të Altinit nga policia.
“Kam dalë për burrin tim sepse e kanë burgosur pa të drejtë. Ai ka ardhur këtu me qëllimin e fëmijës së vet dhe ka protestuar qe ditën e parë. Kërkoj lirim sa më të shpejtë. Ishalla nesër gjykata e liron. Unë nuk ia dal dot vetëm me dy fëmijët e vegjël. Njërin e kam të paralizuar. Isha në punë kur Altini vinte në protestë por tani e kam lënë punën për fëmijët,” tha ajo.
Gruaja gjithashtu shprehu mirënjohjen e saj për të gjithë shqiptarët që kontribuan përmes fushatës GoFundMe, e cila ka mbledhur mbi 150 mijë euro për djalin e saj të sëmurë, i cili ka statusin e invaliditetit.
“I falënderoj të gjithë shqiptarët. Kanë bërë mrekulli për fëmijën tim. 11 vjet po ia dal vetë, me kredi e çdo gjë por shqiptarët janë gjendur edhe për mua si nënë. I falënderoj të gjithë pa masë. Zoti i shpërbleftë dhe i begatoftë,” theksoi ajo.
