Miliona qytetarë në Bregun Lindor të Shteteve të Bashkuara po përballen me temperatura rekord dhe kushte atmosferike të rrezikshme, ndërsa vendi po hyn në fundjavën e festimeve të 4 Korrikut.
Autoritetet kanë njoftuar se kjo valë ekstreme e të nxehtit mund të ketë ndikim në aktivitetet publike dhe të rrisë rrezikun ndaj shëndetit të qytetarëve.
Parashikimet tregojnë se temperaturat pritet të mbeten shumë të larta edhe gjatë së premtes, duke shënuar periudhën më të nxehtë të vitit deri tani. Fenomeni prek rreth 25 milionë banorë në pjesën qendrore dhe lindore të vendit, duke e shoqëruar këtë vapë ekstrem me lagështi të lartë.
Në Nju Jork, temperatura ka arritur deri në 38 gradë Celsius, niveli më i lartë i regjistruar që nga viti 2012, ndërsa Filadelfia ka shënuar 39 gradë Celsius, temperaturën më të lartë që nga viti 2011. Uashingtoni parashikohet të përjetojë një periudhë të gjatë me temperatura të larta, një situatë e rrallë në historinë meteorologjike të kryeqytetit.
Kryebashkiaku i Nju Jorkut, Zohran Mamdani, e ka përshkruar situatën si “jashtëzakonisht të rrezikshme,” duke inkurajuar banorët të tregojnë kujdes dhe të shmangin ekspozimin e panevojshëm ndaj diellit.
Megjithëse temperaturat janë të larta, Presidenti Donald Trump pritet të mbajë një fjalim në ambient të hapur gjatë festimeve të 4 Korrikut, në kuadër të aktiviteteve që shënojnë 250-vjetorin e Shteteve të Bashkuara. Vapa gjithashtu pritet të ndikojë në zhvillimin e disa ndeshjeve të Kupës së Botës, të cilat do të luhen në ambiente të hapura.
Sipas Shërbimit Kombëtar të Motit, pas valës së të nxehtit, disa rajone në Midwest dhe në zonën e Liqeneve të Mëdha mund të goditen nga stuhi të forta, që do të shoqërohen me breshër, erëra të fuqishme, përmbytje të menjëhershme dhe tornado.
Edhe Kanadaja po përballet me temperatura të larta. Në provincën e Kebekut, janë në fuqi paralajmërime për vapë ekstreme, ndërsa stuhitë e fundit kanë lënë pa energji elektrike mbi 137 mijë konsumatorë. Më shumë se 51 mijë abonentë vazhdojnë të jenë pa energji edhe të premten në mëngjes.
Meteorologët dhe studiuesit theksojnë se valët e të nxehtit po bëhen gjithnjë e më të shpeshta, më intensive dhe më afatgjata si rezultat i ndryshimeve klimatike të shkaktuara nga aktiviteti njerëzor.
