Kryetari i Forumit të Partisë Demokratike në Shkodër ka denoncuar gjendjen e pastërtisë në plazhin e Velipojës, duke publikuar pamje dhe akuza ndaj Bashkisë Shkodër për mungesë mirëmbajtjeje në kulmin e sezonit turistik.
Sipas tij, në qendër të Velipojës ka kontenierë të tejmbushur me mbeturina, trotuare të papastruara dhe një aromë të rëndë që vjen nga mbetjet e grumbulluara pranë kontenierëve, të cilët, sipas denoncimit, nuk lahen dhe nuk dezinfektohen.
Në reagimin e tij, ai shprehet se situata është shqetësuese pikërisht në zonën qendrore të plazhit, ndërsa ngre pikëpyetje se si paraqitet gjendja në pjesët e tjera të Velipojës.
Kryetari i Forumit të PD Shkodër akuzon Bashkinë Shkodër se nuk po i kushton vëmendjen e duhur një prej destinacioneve më të rëndësishme turistike të vendit, duke e shoqëruar reagimin me hashtagun #BASHKIA_QË_NUK_DUAM.
Postimi i plotë:
AROMË MBYTËSE NË PLAZHIN E VELIPOJËS.
Kontenier të tejmbushur me mbeturina, trotuare të papastruara dhe një aromë mbytëse që vjen nga mbetjet e kontenierëve në tokë që nuk lahen e as dezinfektohen asnjëherë.
Këto pamje janë në qëndër të Velipojës, imagjinoni pak si është në zonat e tjera.
Jemi pothuajse në kulmin e sezonit turistik në Velipojë, por Bashkia Shkodër duket se nuk e ka aspak prioritet mirëmbajtjen dhe pastërtinë e një prej destinacioneve më të rëndësishme turistike të vendit.
#BASHKIA_QË_NUK_DUAM
