Pas tetë ditësh nën rrënojat e një ndërtese të shembur në Venezuelë, një burrë është nxjerrë gjallë, pas tërmeteve të fuqishme që e goditën vendin më 24 qershor.
Hernan Gil u shpëtua pas një operacioni të komplikuar, më shumë se 100 orë pas që ekipet e kërkim-shpëtimit arritën të zbulonin vendndodhjen e tij nën rreth 140 tonë rrënoja. Në këtë përpjekje morën pjesë qindra profesionistë nga Venezuela, Kili, Kosta Rika, El Salvadori, Meksika, Portugalia dhe Shtetet e Bashkuara.
Një zjarrfikës nga Kili e përshkroi këtë mision si “operacionin më kompleks dhe teknikisht më të vështirë” që kishte përjetuar gjatë karrierës së tij. Gjatë përpjekjeve për shpëtim, kanalet e hapura për të arritur tek i mbijetuari ishin shembur disa herë, duke kërcënuar jetën e ekipeve të shpëtimit dhe vetë Gilit.
Pasi arritën të kishin kontakt vizual me të përmes një kamere të vogël, ata i ofruan ujë, maskë mbrojtëse, syze dhe serum. Sipas mjekëve, ai ishte në gjendje të stabilizuar dhe, për mrekulli, nuk kishte pësuar lëndime të rënda.
“Hernán na fliste vazhdimisht, na inkurajonte të vazhdonim dhe madje kërkonte pije me shijet e tij të preferuara,” kanë treguar anëtarët e ekipit të shpëtimit.
Gil ndodhej në një kabinë betoni në bodrumin e parkimit pranë qendrës tregtare Galerias Playa Grande, në qytetin Catia La Mar, kur dy tërmetet goditën. Sipas autoriteteve, struktura e kabinës krijoi një “guaskë” mbrojtëse që i shpëtoi jetën.
Bilanci zyrtar i dy tërmeteve ka arritur rreth 2.300 viktima, ndërkohë që dhjetëra mijëra persona janë ende të zhdukur.
