Avokati Alban Duraj, duke folur për mediat nga Komisariati 4, theksoi se ishin shkelur kriteret ligjore për zbatimin e masës së arrestit në flagrancë ndaj disa individëve të shoqëruar nga policia gjatë protestave.
Ai sqaroi se arrestimi në flagrancë duhet të aplikohet vetëm në rastet kur veprat penale parashikojnë një dënim minimal prej pesë vitesh burgim, një rregull këtë që sipas tij, nuk është respektuar në situatën aktuale.
Duraj njoftoi se deri tani nuk ka pasur njoftime zyrtare për tre të shoqëruarit, duke pretenduar se procedurat që po ndiqen janë rezultat i “urdhrave politikë”. Ai shprehu se arrestimi në flagrancë nuk ishte i nevojshëm dhe që hetimet duhet të zhvilloheshin në gjendje të lirë.
Për më tepër, avokati theksoi se protestuesit kishin reaguar përballë dhunës së pajustifikuar dhe disproporcionale, duke shkruar se ishte përdorur force policore me shkopinj gome.
Duraj u bëri thirrje prokurorit dhe autoriteteve, përfshirë drejtorin e Policisë Skënder Hitaj, që të urdhërojnë lirimin e menjëhershëm të të shoqëruarve dhe të shmangin procedurat penale ndaj tyre.
Ai gjithashtu kërkoi nga Ministri i Brendshëm dhe Kryeministri Edi Rama të reagojnë patjetër, duke paralajmëruar se situata mund të shkaktojë një “revoltë të ligjshme” nëse nuk merren masa të menjëhershme.
Duraj informoi se protesta e parashikuar për datën 4 pritet të jetë një nga më të mëdhatë, duke theksuar se policia, sipas tij, tashmë ka një plan veprimi të përgatitur.
“Janë shkelur kriteret për masën e arrestit, kur dikush arrestohet në flagrancë duhet të ketë kryer një krim që dënohet minimumi 5 vite.
Ata policë që kanë zbatuar urdhra të paligjshëm, do të mbajnë përgjegjësi, u bëjmë thirrje policëve të mos kryejnë veprime të paligjshme, gjithçka është e filmuar.
E kemi parë se me çfarë përballeshin punonjësit e administratës që zbatojnë urdhrat e eprorëve.
Nuk kemi asnjë njoftim për tre të shoqëruarit, ata presin urdhrat dhe këto janë politike. Nuk duhej të ishim në arrestim në flagrancë.
Protestuesit janë kundërpërgjigjur sepse janë sulmuar, dhuna ka qenë disproporcionale, pasi përdorën shkopinj gome dhe numri i forcave policore ka qenë i madh.
Ajo që kërkojmë nga Hitaj dhe prokurori është që të urdhërojnë menjëherë lirimin dhe të bëjnë hetime në gjendje të lirë, pa procedime penale.
Ministri i Brendshëm dhe Rama duhet të reagojnë menjëherë. I drejtojmë kërkesë Ramës që protestuesit të kthehen në familjet e tyre, përndryshe do të shkaktojë revoltë, që është e ligjshme.
Kemi edhe protestën e datës 4 që do të jetë një nga më të mëdhatë dhe policia ka pasur një plan.
Uroj që Rama dhe prokurori të vendosin lirimin e menjëhershëm,” u shpreh avokati.
