Në Spanjë, mbi 1 mijë individë kanë humbur jetën si rezultat i temperaturave ekstremale, ndërsa vendi ka përjetuar gjashtëmujorin më të nxehtë ndonjëherë, sipas informacioneve të autoriteteve.
Instituti Shëndetësor “Carlos III” ka njoftuar se gjatë muajit qershor janë regjistruar 1,028 raste vdekjesh të lidhura me të nxehtin, shifër që përbën më shumë se dyfishin e 407 viktimave të raportuara në të njëjtën periudhë të vitit të kaluar. Ky është gjithashtu numri më i lartë i vdekjeve nga i nxehti për muajin qershor që nga viti 2015.
Kulmin e valës së të nxehtit Spanja e arriti më 23 qershor, kur afërsisht 73 për qind e popullsisë ishte e ekspozuar ndaj rrezikut të lartë për shëndetin.
Agjencia Kombëtare Meteorologjike e Spanjës (AEMET) theksoi se qershori ishte muaji i dytë më i nxehtë ndonjëherë në vend, me një temperaturë mesatare që ishte 3.2 gradë Celsius më e lartë se norma.
Valë të ngjashme të të nxehtit kanë përfshirë një pjesë të madhe të Evropës, me temperatura që kanë tejkaluar 40 gradë Celsius në Francë, Gjermani, e gjithashtu në vende të Ballkanit. Organizata Botërore e Shëndetësisë ka vlerësuar se mbi 1,300 persona kanë ndërruar jetë në kontinent për shkak të temperaturave ekstreme.
Drejtori Rajonal i OBSH-së për Evropën, Hans Kluge, deklaroi se situata aktuale është një “provë gjenerale” për një të ardhme ku valët e të nxehtit do të rriten në frekuencë, intensitet dhe gjatësi, ndërsa Evropa po ngrohet më shpejt se dyfishi i mesatares globale.
Ai paralajmëroi se mungesa e përgatitjes adekuate për ngjarje ekstreme të nxehtësisë mund të rezultojë në një rritje të ndjeshme të vdekjeve, sidomos tek grupet më të rrezikuara, si të moshuarit, punëtorët në ambiente të jashtme, dhe individët me sëmundje kronike.
