Zëvendëskryeministrja Albana Koçiu ka bërë një deklaratë pas ngjarjeve të dhunshme të ndodhura jashtë Kuvendit, duke dënuar ashpër sulmet verbale dhe fizike të shfaqura gjatë protestës.
Me anë të një njoftimi publik, Koçiu e quajti të papranueshme çdo lloj dhune, duke theksuar se këto sjellje dalin jashtë normave demokratike dhe nuk i bëjnë nder as protestës, as atyre që pretendojnë të përfaqësojnë qytetarët.
“Skenarët për destabilizim dhe kaos, të orkestruar nga një grup i vogël njerëzish që i vendosin agjendat e tyre politike mbi interesin e vendit, nuk mund dhe nuk do ta marrin kurrë peng jetën publike dhe politike të Shqipërisë”, ka thënë ajo.
Po ashtu, zëvendëskryeministrja thekson se përpjekjet e tilla do të dështojnë, siç kanë dështuar edhe në të shkuarën, dhe nënvizon se shqiptarët zgjedhin rrugën e zhvillimit dhe integrimit në Bashkimin Europian.
