Bilanci i viktimave nga dy tërmetet e fuqishme që preku Venezuelën mbrëmjen e së mërkurës vazhdon të rëndohet. Presidentja në detyrë e vendit njoftoi se numri i të ndierëve ka arritur në 589, duke shënuar një rritje të konsiderueshme krahasuar me 235 viktimat e konfirmuara që ishin raportuar disa orë më parë.
Autoritetet theksuan se 2.980 njerëz kanë pësuar lëndime, ndërsa mbi 50 mijë janë ende të zhdukur, sipas platformës ku familjarët kanë raportuar humbjen e kontaktit me të afërmit e tyre.
Ndërkohë, ekipet e kërkim-shpëtimit nga vende të ndryshme kanë filluar të arrijnë në Venezuelë për të ndihmuar në operacionet e shpëtimit. Sipas të dhënave nga OKB-ja, të paktën 17 shtete kanë dërguar ose janë në proces të dërgimit të ekipeve të specializuara për kërkimin e të mbijetuarve.
Ekipet janë tashmë në terren nga Kili, Kolumbia, El Salvadori, Italia, Meksika, Zvicra, dhe Shtetet e Bashkuara, ndërsa pritet mbërritja e forcave nga Britania e Madhe, Franca, Gjermania, Spanja, Holanda, Katari, Jordania, Çekia, dhe Ekuadori.
Operacionet e kërkimit po zhvillohen në kushte shumë sfiduese. Një zjarrfikës i angazhuar në terren shpjegoi se ndihen të munguar si personeli, ashtu edhe pajisjet e nevojshme për nxjerrjen e viktimave nga rrënojat.
“Nuk kemi mjaftueshëm njerëz dhe mjete. Është një garë me kohën,” tha ai, duke theksuar se është ndjeshëm më e vështirë të gjenden të mbijetuar sesa trupat e viktimave.
Ekspertët theksojnë se ekipet e shpëtimit kanë një “dritare të artë” prej rreth 72 orësh pas tërmetit për të lokalizuar njerëz të gjallë nën rrënoja, përpara se kushtet e dehidratimit, plagët e rënda dhe shembjet e mëtejshme të ulin ndjeshëm shanset për mbijetesë.
Paralajmërimi i sizmologëve
Ekspertët kanë paralajmëruar gjithashtu se vendi duhet të jetë i përgatitur për një sërë pasgoditjesh të gjata. Sizmologu Stephen Hicks nga University College London theksoi se është e pazakontë që dy tërmete me magnitudë të ngjashme ndodhin kaq afër njëri-tjetrit, si në kohë ashtu edhe në hapësirë.
Sipas tij, Venezuela pritet të përjetojë qindra pasgoditje në javët dhe muajt e ardhshëm, ndonëse shumica prej tyre nuk do të arrijnë fuqinë shkatërruese të dy tërmeteve kryesore.
