Seanca gjyqësore ndaj kryetarit të Bashkisë së Vaut të Dejës, Kristjan Shkreli, është shtyrë për më 14 korrik në orën 14:00. Shtyrja erdhi pas kërkesës së SPAK, i cili kërkoi kohë shtesë për administrimin e provave shkresore.
Në sallën e gjyqit dëshmoi banori i Vaut të Dejës, Aleksandër Dodani, i cili deklaroi se i qëndron plotësisht dëshmisë së dhënë më herët para prokurorëve.
Gjatë pyetjeve të SPAK-ut, Dodani u shpreh se kishte pasur një telefonatë nga Kristjan Shkreli gjatë periudhës së fushatës zgjedhore për zgjedhjet e 11 majit 2025, por theksoi se nuk i ishte kërkuar vota dhe as nuk i ishte premtuar ndonjë përfitim.
Dëshmitari mohoi gjithashtu çdo formë presioni nga ana e kryebashkiakut, duke deklaruar para gjykatës se kontakti mes tyre kishte qenë normal dhe pa ndikim në qëndrimin e tij politik.
Procesi do të vijojë në seancën e ardhshme, ku pritet të paraqiten edhe provat e kërkuara nga organi i akuzës.
