Debati mes figurave të Partisë Socialiste është përshkallëzuar pas pjesëmarrjes së ish-kandidatit për deputet në Qarkun Shkodër, Paulin Luli, në protestën e zhvilluar kundër qeverisë.
Prania e Lulit në protestë dhe thirrjet e tij për largimin e kryeministrit Edi Rama sollën reagimin e zv.ministres së Infrastrukturës dhe Energjisë, Edona Bilali. Përmes një postimi publik, ajo iu drejtua ish-kolegut socialist me tone të ashpra, duke vënë në dyshim imazhin që ai ka krijuar për veten gjatë viteve të emigracionit në Gjermani.
Por reagimi i Bilalit nuk ka kaluar pa kundërshti brenda së majtës. Në mbrojtje të Paulin Lulit ka dalë kryebashkiaku i Lezhës, Pjerin Ndreu, i cili e ka konsideruar të padrejtë sulmin ndaj punës dhe jetës së tij në emigracion.
Ndreu shprehet se nuk është dakord me angazhimin e Lulit në protesta apo me qëndrimet e tij të fundit politike, por thekson se puna që ai ka bërë në Gjermani nuk duhet të vihet në diskutim.
“Edhe pse nuk gjej arsye që një mik i imi të marrë pjesë apo të nxisë protesta, nuk mendoj se është e drejtë të etiketohet sikur ka siguruar jetesën me punë të pandershme. Në emigracion nuk ka asnjë njollë në aktivitetin e tij, përkundrazi. Nuk më pëlqen ajo që po bën këto ditë, por vlerësoj përkushtimin dhe punën që ka ndërtuar me mund e djersë në Gjermani”, shprehet Ndreu.
