Një tragjedi ka ndodhur në Bedford, Mbretëria e Bashkuar, ku një makinist treni ka humbur jetën dhe 89 persona kanë pësuar lëndime si pasojë e një përplasje mes dy trenave.
Incidenti ndodhi pasditen e së premtes në jug të Bedfordit, kur një tren i East Midlands Railway, që po udhëtonte nga Corby drejt Londrës, goditi nga pas një tjetër tren të të njëjtës kompani në lëvizje nga Nottingham për në kryeqytet. Sipas informacioneve nga autoritetet, drejtuesi i trenit që përplasi tjetërin ka vdekur në vendngjarje.
Shërbimet e emergjencës konfirmuan se 89 persona u plagosën gjatë incidentit. Nga ata, 11 kanë pësuar lëndime shumë të rënda, 22 kanë marrë lëndime të rënda, ndërsa 56 të tjerë janë plagosur më lehtë. Në operacionin e shpëtimit morën pjesë dhjetëra ambulanca, ekipe zjarrfikëse dhe helikopterë mjekësorë.
Autoritetet britanike kanë nisur një hetim të thelluar për të zbuluar shkaqet e këtij aksidenti tragjik. Hetuesit janë duke shqyrtuar të dhënat teknike dhe sistemet e sinjalizimit, por ende nuk ka një informacion të qartë rreth shkakut të saktë të përplasjes.
Kryeministri britanik, Keir Starmer, bashkë me zyrtarë të tjerë të lartë, kanë shprehur ngushëllimet e tyre për familjen e viktimës dhe kanë falënderuar ekipet e emergjencës për reagimin e shpejtë. Ndërkohë, trafiku hekurudhor në linjën drejt Londrës është ndalur për disa orë, duke shkaktuar vonesa dhe anulime të shumta në shërbime.
