Trupi i një burri është zbuluar në pjesën e poshtme të një avioni të “Air Arabia”, i cili kishte aterrur në aeroportin Gatwick të Londrës pas një fluturimi nga Maroku.
Sipas raportimeve nga BBC, shërbimet e emergjencës u thirrën për të ndërhyrë menjëherë pas gjetjes së trupit në avionin që kishte mbërritur nga qyteti i Tanxherit, rreth orës 11:45 të mëngjesit të martën.
Një zëdhënës i aeroportit nga West Sussex ka konfirmuar këtë ngjarje dhe ka shprehur se ekipet e aeroportit janë në bashkëpunim me policinë dhe mjekun ligjor për hetimin e situatës.
Autoritetet britanike kanë nisur një hetim për të zbardhur rrethanat e kësaj tragjedie, ndërsa ende nuk janë publikuar informacionet lidhur me identitetin e viktimës ose me mënyrën se si ai ka arritur në atë pjesë të avionit.
