Një qytetar, i pranishëm në protestën e 18-të që kërkon dorëheqjen e kryeministrit Edi Rama dhe qeverisë, ka shprehur shqetësimin e tij për situatën ekonomike dhe për fluksin e të rinjve që po braktisin vendin.
Gjatë fjalës së tij, ai bëri thirrje për mobilizimin e rinisë në protestat që kanë për objektiv kundërshtimin e qeverisë aktuale.
“Rinia duhet të dalë në shesh për të përzënë këta qeveritarë që na kanë vjedhur. Ata kanë akumuluar pasuri vetëm për vete, ndërsa për popullin nuk kanë menduar asgjë. Unë marr një pension qesharak, ndërsa ata as vetë nuk e dinë se sa pasuri kanë,” u shpreh ai.
Ai gjithashtu përmendi me shqetësim fenomenin e emigracionit masiv, duke theksuar se veriu i Shqipërisë po përballet me një mungesë të dukshme të të rinjve.
“Jam nga veriu dhe mund t’ju siguroj se nuk ka më rini. Të moshuarit kanë mbetur, ndërsa të rinjtë kanë ikur,” tha ai.
