A mundet një shtet të vendosë kufizime mbi popullsinë e tij? Po, dhe këtë të diel në Zvicër pritet të ketë një referendum për këtë çështje.
Qytetarët do të votojnë mbi një propozim të paprecedentë nga e djathta ekstreme, i cili synon të kufizojë popullsinë e vendit në 10 milionë banorë deri në vitin 2050.
Autoritetet përkatëse dhe organizatat ekonomike kanë ngritur shqetësime se miratimi i kësaj nisme mund të ketë pasoja të rënda për ekonominë e vendit, si edhe për marrëdhënien me Bashkimin Evropian. Nëse propozimi merr mbështetje nga shumica e votuesve, qeveria zvicerane do të detyrohet të zbatojë masa që do ta parandalojnë kalimin e numrit të popullsisë mbi 10 milionë deri në vitin 2050. Aktualisht, Zvicra ka një popullsi prej rreth 9.1 milion banorësh.
Nëse numri i banorëve arrin në 9.5 milionë para vitit 2050, do të vendosen kufizime të rrepta për bashkimin familjar, për proceset e lejeve të qëndrimit dhe për azilin.
Nisma është promovuar nga Partia Popullore Zvicerane, një forcë e djathtë konservatore, e cila gjithashtu kërkon që Zvicra të tërhiqet nga marrëveshja për lëvizjen e lirë me Bashkimin Evropian nëse popullsia e tejkalon atë kufi para vitit 2050. Një tërheqje e tillë do të shkaktonte humbjen e aksesit në tregun e përbashkët evropian.
Mbështetësit e nismës “Jo një Zvicër me 10 milionë banorë” argumentojnë se imigrimi i lartë, kryesisht nga vendet e BE-së, po shkakton presion të madh mbi infrastrukturën e strehimit, shkollat, sistemin e transportit dhe shërbimet sociale. Ata theksojnë se rritja e shpejtë e popullsisë ka filluar të ndryshojë mënyrën tradicionale të jetesës në vend.
Megjithatë, qëndrimi i qeverisë federale, parlamentit, sindikatave dhe organizatave kryesore të biznesit është në mënyrë të qartë kundër këtij propozimi. Sipas tyre, kufizimi i popullsisë do të sillte pasoja negative për ekonominë, do të rrezikonte stabilitetin e vendit dhe do të cenonte prosperitetin e Zvicrës.
Ekonomistët e kanë theksuar se vendi ka nevojë për emigracion për shkak të rënies së normave të lindjes dhe plakjes së popullsisë. Në këtë kontekst, rreth 27% e banorëve të Zvicrës nuk janë shtetas zviceranë, dhe popullsia ka pësuar një rritje prej 23% që nga hyrja në fuqi e marrëveshjes për lëvizjen e lirë me BE-në në vitin 2002.
Sondazhet paraprake tregojnë se 52% e zviceranëve pritet të votojnë kundër propozimit për kufizimin e popullsisë. Për t’u miratuar, kjo nismë do të duhet të sigurojë jo vetëm shumicën e votës popullore, por gjithashtu mbështetje nga shumica e kantoneve zvicerane. Rezultatet përfundimtare pritet të shpallen pasdite të dielën.
