Këshilltari i Bashkisë Shkodër, Mirsad Basha ka ngritur shqetësimin për mungesën e zyrës së informacionit turistik në qytet, duke akuzuar drejtuesit vendorë se prej gati një viti Shkodra ka mbetur pa një shërbim të tillë për vizitorët.
Sipas tij, qindra turistë që mbërrijnë çdo ditë në qytet përballen me dyer të mbyllura dhe mungesë informacioni, ndërsa heqja e zyrës ekzistuese nuk është shoqëruar ende me ngritjen e një strukture të re funksionale.
Në reagimin e publikuar në rrjetet sociale, ai kërkon rikthimin e menjëhershëm të zyrës turistike në vendndodhjen e mëparshme dhe ngre pikëpyetje për fondin prej 70 milionë lekësh të parashikuar për zyrën e re.
“Ku kanë shkuar 70 milionë lekët e parashikuara për zyrën e re, kur deri më sot nuk shihet asnjë rezultat konkret?”, shtron ai pyetjen, duke kërkuar transparencë nga Bashkia Shkodër.
Deklarata vjen në kulmin e sezonit turistik, kur Shkodra po pret një numër të lartë vizitorësh vendas dhe të huaj. Në mungesë të një zyre informacioni, kritikat ndaj bashkisë janë përqendruar te mënyra se si po menaxhohet promovimi dhe orientimi i turistëve në qytet.
Postimi i plotë:
Nuk e kuptoj pse drejtuesit e Bashkise Shkoder, Ermira Teliti dhe Benet Beci, prej gati nji viti e kane lane qytetin pa zyren informuese turistike. Qindra turiste ne dite shkojne aty dhe gjejne vetem rrenoja. Kjo nuk asht aspak e hijshme per Shkodren dhe per promovimin e saj. Asht nji gafë e madhe me hek zyren ekzistuese pa e pas gati ate te ren.
Te pakten te rivendoset zyra e vjeter aty ku ka kene. Perndryshe, lind e drejta me pyet se ku kane shku ato 70 milion lek te parashikume per zyren e re, kur deri me sot nuk shihet asnji rezultat konkret, apo dhe keto 70 miljon dojne me i cu tek aktivitete dhe eventet qe krijojne e fitojne me organizatat e tyne !
