Anëtari i Këshillit Bashkiak të Shkodrës, Imeld Sokoli, ka rikthyer në vëmendje premtimin për ndërtimin e urës së re mbi Bunë, që do të lidhte Velipojën me Ulqinin.
Përmes një reagimi në rrjetet sociale, Sokoli kujton se projekti u prezantua katër vite më parë, por sipas tij, ende nuk është realizuar, ndërsa është përdorur në disa fushata elektorale radhazi.
“Si sot 4 vite më parë u premtua ura e re e Bunës që duhej të lidhte Velipojën me Ulqinin. Që nga ajo ditë kanë kaluar tre fushata elektorale ku është përdorur ky projekt”, shkruan ai.
Sokoli thekson se premtimet nuk mund të përsëriten pafundësisht pa rezultate konkrete dhe se qytetarët kanë të drejtë të kërkojnë llogari për projektet e shpallura ndër vite.
Sipas tij, koha e premtimeve ka kaluar dhe tashmë përgjegjësit duhet të japin shpjegime për mosrealizimin e investimit të shumëpërfolur që do të lidhte dy anët e kufirit mes Shqipërisë dhe Malit të Zi.
