Një pjesë e qytetit të Shkodrës do të mbetet pa furnizim me ujë të pijshëm ditën e sotme, për shkak të punimeve në kuadër të projektit të ri të realizuar nga KfW dhe lidhjes së linjës kryesore të tubacioneve.
Sipas njoftimit zyrtar, ndërprerja e furnizimit me ujë do të prekë lagjen Rus, qendrën e qytetit dhe lagjen “Skënderbeg” (zona e spitalit).
Furnizimi me ujë do të ndërpritet nga ora 12:00 deri rreth orës 24:00, ndërsa autoritetet u bëjnë thirrje qytetarëve të marrin masa paraprake për përballimin e kësaj situate.
Njëkohësisht, njoftohen të gjithë qytetarët e zonave të prekura nga projekti që të paraqiten pranë Qendrës së Kujdesit ndaj Klientit për të lidhur kontratat e reja të furnizimit me ujë.
Sipas autoriteteve, mosrealizimi i kësaj procedure mund të sjellë probleme në vijimësinë e furnizimit me ujë në të ardhmen.
Punimet janë pjesë e investimit në rrjetin e ri të ujësjellësit, që synon përmirësimin e furnizimit afatgjatë në qytetin e Shkodrës.
