Vllaznia ka vendosur t’i japë besim edhe për sezonin e ardhshëm mesfushorit moldav Cristian Dros. Pavarësisht se edicioni i fundit nuk shkoi sipas pritshmërive për shkak të problemeve fizike që e penalizuan në disa momente, drejtuesit kuqeblu kanë vlerësuar kontributin dhe cilësitë e lojtarit, duke arritur marrëveshjen për rinovimin e kontratës.
Mesfushori, i cili numëron 18 paraqitje me përfaqësuesen e Moldavisë, do të vijojë të jetë pjesë e skuadrës shkodrane edhe gjatë sezonit të ardhshëm, duke u konsideruar një nga elementët me eksperiencë në repartin e mesfushës.
Konfirmimi ka ardhur nga vetë klubi shkodran përmes një njoftimi zyrtar, ku bëhet e ditur se palët kanë gjetur gjuhën e përbashkët për vazhdimin e bashkëpunimit edhe për një vit tjetër.
Me rinovimin e Dros, Vllaznia vijon punën për ndërtimin e skuadrës që do të përfaqësojë klubin në sezonin e ri, me synimin për të qenë sërish konkurruese në objektivat e saj.
