Shqipëria ka tashmë një qendër të modernizuar për çaktivizimin e armëve të zjarrit. Prezenca e OSBE-së në vend përfundoi rikonstruksionin dhe pajisjen me teknologji të re të Qendrës së Çaktivizimit të Armëve në Mullet, një investim që synon forcimin e kapaciteteve në luftën kundër trafikimit dhe keqpërdorimit të armëve të vogla dhe të lehta.
Në ceremoninë e inaugurimit morën pjesë përfaqësues të lartë të institucioneve shqiptare dhe partnerëve ndërkombëtarë. Kryetari i Prezencës së OSBE-së në Shqipëri, Michel Tarran, e cilësoi projektin si një hap të rëndësishëm në mbështetje të sigurisë publike dhe bashkëpunimit mes institucioneve.
Zëvendësministri i Brendshëm, Besfort Lamallari, vlerësoi se investimi do të forcojë kapacitetet e shtetit shqiptar për kontrollin e armëve, municioneve dhe eksplozivëve, duke ndikuar drejtpërdrejt në rritjen e sigurisë publike dhe në përafrimin me standardet europiane.
Sipas autoriteteve, qendra e re dhe pajisjet e vendosura në të do të mundësojnë kryerjen e proceseve të çaktivizimit sipas standardeve bashkëkohore, duke rritur efikasitetin në kontrollin e armëve dhe duke kontribuar në sigurinë e qytetarëve.
Drejtori i Përgjithshëm i Policisë së Shtetit, Skënder Hita, theksoi se ky investim përfaqëson një garanci më shumë për sigurinë e vendit dhe të brezave të ardhshëm.
