Ndërsa sot mijëra nxënës iu rikthyen bankave për nisjen e vitit të ri shkollor, fëmijët e Muriqanit përballen me një realitet krejt tjetër. Shkolla e vetme e zonës është mbyllur, duke lënë nxënësit pa mundësinë për të ndjekur mësimin në vendbanimin e tyre.
Rastin e ka denoncuar ish-kandidatja për deputete e Partisë Demokratike në Shkodër, e cila ngre pikëpyetje mbi vendimin e marrë dhe pasojat që ai mund të ketë për familjet e zonës dhe shpopullimin e Anës së Malit.
Denoncimi i plotë
Skandal në shkollën e Muriqanit: mbyllet shkolla e vetme dhe fëmijët mbesin pa shkollë! Sot të gjithë nisen shkollën përveç femijeve të Muriqanit, ata mbeten pa shkollë, pa arsim, pa të ardhme dhe me prindër që iu shtua edhe një hall më tepër.
Prandaj sot pyetja nuk duhet të jetë:
“Sa nxënës kanë mbetur?”
Pyetja duhet të jetë:
“Çfarë po bëjmë që ata të mos ikin?”
Unë dua një Shkodër ku edhe fëmija i Muriqanit të ketë të njëjtën të drejtë për të ardhmen si fëmija i qytetit.
Muriqani nuk ka nevojë të mbyllë shkollën por, të hapë një kapitull të ri. Unë do të vazhdoj të flas për këtë, sepse shpopullimi nuk është statistikë. Janë shtëpi që mbeten bosh, prindër që largohen, fëmijë që rriten larg vendlindjes.
Bashkia Shkodër dhe Ministria e Arsimit duhet të dalin dhe të japin llogari:
Kush e vendosi mbylljen?
Pse u mor ky vendim?
Çfarë zgjidhjeje iu ofrua Muriqanit?
Dhe çfarë plani ka Bashkia për të ndalur shpopullimin e Anës së Malit?
Kjo është mënyra se si një zonë shpopullohet: jo me një vendim të vetëm, por duke ia hequr njerëzve, një nga një, arsyet për të qëndruar.
Unë nuk dua ta shoh Anën e Malit të zbrazet.
