Një incident i rëndë ndodhi në fshatin Rrushkull të Manzës, në rrethin e Durrësit, ku një 37-vjeçar ka sulmuar prindërit e tij me sende të forta pranë banesës familjare.
Policia bën me dije se autori, i cili është identifikuar me inicialet E. K. dhe dyshohet të ketë probleme të shëndetit mendor, ka ushtruar dhunë ndaj të atit 72-vjeçar, S. K., si edhe nënës së tij 69-vjeçare, F. K.
Të dy prindërit kanë pësuar lëndime si pasojë e goditjeve dhe janë dërguar menjëherë për ndihmë mjekësore. Nëna është shtruar në Spitalin Rajonal të Durrësit dhe ndodhet në gjendje të stabilizuar, ndërsa babai, që ka marrë plagë në pjesën e kokës, është në gjendje kritike dhe është transportuar drejt Spitalit të Traumës në Tiranë për trajtim të specializuar.
Autori 37-vjeçar është shoqëruar në komisariat nga policia, ku po kryhen veprimet e mëtejshme procedurale.
Autoritetet hetimore, nën drejtimin e Prokurorisë, vijojnë punën për zbardhjen e plotë të rrethanave dhe shkaqeve të ngjarjes.