Vala e tretë e të nxehtit pritet të arrijë kulmin në Itali gjatë orëve në vijim, ndërsa autoritetet kanë rritur nivelin e alarmit në shumë qytete të vendit.
Të premten, më 17 korrik, 16 qytete do të jenë nën alarm të kuq për shkak të temperaturave ekstreme, krahasuar me 15 qytete të enjten, më 16 korrik, dhe shtatë të mërkurën, më 15 korrik.
Qytetet e përfshira në alarmin e kuq janë: Bolonja, Brescia, Bari, Campobasso, Firence, Frosinone, Xhenova, Latina, Milano, Palermo, Perugia, Pescara, Rieti, Roma, Torino dhe Viterbo.
Ndërkohë, Ankona, Civitavecchia, Messina dhe Napoli mbeten nën alarm portokalli, ku temperaturat e larta paraqesin rrezik veçanërisht për grupet më të cenueshme të popullsisë.
Në veri të Italisë pritet një ndryshim i motit. Autoritetet kanë lëshuar paralajmërim për stuhi të forta në Lombardi, me rrezik për reshje intensive shiu dhe breshër në të gjithë Luginën e Po-së. Rajonet Emilia-Romagna dhe Veneto janë vendosur nën alarm të verdhë për shkak të kushteve të paqëndrueshme atmosferike.
