Një tempull datuar në shekujt 4-3 para Krishtit është gjetur në Shkodër, në një zonë afër Bushatit. Që prej disa vitesh, arkeologët shqiptarë dhe polakë, nën udhëheqjen e Saimir Shpuzës, po zhvillojnë gërmime që kanë nxjerrë në pah struktura të qytetit antik, i njohur si Basania, ndonëse ende nuk janë zbuluar mbishkrime që konfirmojnë emrin e saj të lashtë.
“Një strukturë që mund ta identifikojmë si një tempull është zbuluar në majën e kodrës, dhe kjo daton në shekujt 4-3 para erës sonë. Po ashtu, u gjet edhe një fragment fortifikimi që i përket më vonë, ndoshta shekullit 2-1 para erës sonë,” deklaroi Saimir Shpuza për Balkanweb.
Qyteti antik që ndodhet pas kodrave pranë Bushatit, vazhdon të sjellë çdo vit prova arkeologjike nga shekulli 4 para Krishtit. Deri tani, janë zbuluar një portë e madhe, një sallon pritjesh dhe një tempull. Arkeologët janë angazhuar në kërkimin e një qytetërimi që daton mbi 2 mijë vjet më parë. Elementet e këtij qyteti të humbur ilir fillojnë në afërsi të rrugës nacionale, në vendin ku ndodhet porta jugore. Duke rindërtuar imagjinativisht qytetin e vjetër, kërkimet e arkeologëve zbulojnë çdo vit elemente të reja, përfshirë sallone pritjesh që ndihmonin në organizimin e festave ilire. Në Mesjetë, zona iu dha Skënderbeut nga venecianët. Ky qytet ilir, i shtrirë në 20 hektarë, ndodhet në kodrën ku u vërtetua praninë e një tempulli dhe përmban 19 vendbanime të tjerë nga periudha të ndryshme historike.