Një sulm ajror rus në Ukrainën perëndimore, vetëm disa kilometra larg kufirit me Poloninë, ka shkaktuar alarm të menjëhershëm mes autoriteteve dhe ushtrisë polake. Pas shpërthimeve të fuqishme në zonën kufitare të Yahodyn-it, qeveria polake reagoi duke ngritur në gatishmëri aviacionin ushtarak, ndërpreu fluturimet civile në dy aeroporte kryesore dhe i paralajmëroi qytetarët për rrezikun e një sulmi ajror.
Sipas njoftimit të Komandës Operacionale të Forcave të Armatosura të Polonisë, avionët luftarakë u ngritën për të parandaluar çdo hyrje të mundshme të dronëve ose raketave të lëshuara nga Rusia pranë kufirit polak.
Rreth mesditës, banorët në provincat Lublin dhe Podkarpackie morën njoftime urgjente me SMS nga Qendra e Sigurisë Qeveritare. Në këto mesazhe paralajmërohej: “KUJDES! Kërcënim për sulm ajror. Gjeni një vend të sigurt dhe ndiqni udhëzimet e shërbimeve të emergjencës.” Në të njëjtën kohë, sirenat e alarmit u dëgjuan në Lublin dhe Rzeszów, ndërsa Agjencia e Navigimit Ajror (PANSA) vendosi pezullimin e përkohshëm të fluturimeve në aeroportet e këtyre qyteteve që të mundësohej veprimtaria ushtarake.
Pasi situata u vlerësua dhe u konfirmua se hapësira ajrore e Polonisë nuk ishte shkelur, alarmi u hoq rreth orës 12:50.
Në një konferencë për shtyp pas një takimi me kancelarin austriak Christian Stocker, kryeministri polak Donald Tusk e përshkroi sulmin rus si “masiv dhe jashtëzakonisht brutal”. Ai theksoi se goditja ndodhi pothuajse në kufi me Poloninë dhe kishte në shënjestër një stacion karburanti, që shkaktoi një shpërthim të madh.
Tusk po ashtu vuri në dukje se ky përshkallëzim përkoi me 17 shtatorin, datë simbolike që përkujton pushtimin e Polonisë nga Bashkimi Sovjetik në vitin 1939, dhe e quajti atë “një kujtesë dramatike për sfidat e sotme të sigurisë”.
Ndërkohë, ministri i Mbrojtjes Władysław Kosiniak-Kamysz deklaroi se Rusia po vazhdon politikën agresive, duke theksuar se Polonia ka shtuar prezencën e helikopterëve dhe avionëve F-16, si dhe ka forcuar sistemet e mbrojtjes ajrore dhe reagimit të shpejtë në të gjithë vijën kufitare.
