Stambolli u përball sot me reshje të forta shiu në disa zona, pasi Drejtoria e Përgjithshme e Meteorologjisë kishte lëshuar një paralajmërim për mot të keq.
Shirat e dendur u shtrinë në lagjet Şila, Sultanbeyli, Maltepe dhe ishujt në anën anatoliane të qytetit, duke shkaktuar përmbytje të rrugëve dhe duke penguar ndjeshëm lëvizjen e automjeteve. Për pasojë, u raportuan dy aksidente rrugore si rezultat i kushteve të këqija atmosferike, ku mbetën të plagosur gjithsej 10 persona.
Në Esenjurt ndodhi një përplasje zinxhir ku u përfshinë 11 automjete, duke lënë të lënduar gjashtë vetë. Ndërkaq, në zonën Uzuncayir të Uskudarit ndodhi një tjetër aksident ku tre mjete u përplasën, duke shkaktuar katër të plagosur.
Menjëherë në vendngjarje u dërguan forcat e policisë, ekipet mjekësore dhe zjarrfikësit. Të dëmtuarit morën ndihmën e parë në vend, për t’u transportuar më pas në spitalet më të afërta. Edhe në pjesë të tjera të Stambollit janë regjistruar aksidente me dëme materiale si pasojë e reshjeve të rrëmbyeshme.
