Sezoni i turizmit veror ka sjellë një rritje të dukshme në numrin e automjeteve që qarkullojnë në qytetin e Shkodrës. Në orët e mesditës sot, trafik i dendur u vërejt në hyrjen e qytetit, me radhë të gjata të makinave të regjistruara kryesisht në dalje. Për të administruar situatën dhe për të parandaluar kaosin në qarkullim, oficerët e Policisë Rrugore kanë ndërhyrë në terren, duke udhëhequr fluksin e automjeteve në pikat më problematike.
Ndërsa sipas përvojës nga vitet e mëparshme, ky fluks i automjeteve pritet të rritet më tej dhe të arrijë kulmin e tij gjatë muajit gusht. Megjithatë, investimet aktuale në infrastrukturën rrugore pritet të sjellin përmirësime të rëndësishme në situatën e trafikut dhe të lehtësojnë qarkullimin në të ardhmen.
