Një zjarr i përmasave të mëdha është rikthyer gjatë natës në fshatin Gojan i Vogël, në Pukë, duke rrezikuar zonat pranë banesave.
Njoftimi për zjarrin është marrë rreth orës 01:30 të mëngjesit, ndërsa në momentin e mbërritjes së forcave në terren, flakët paraqiteshin me intensitet të lartë, rreth 200 metra larg banesave.
Për përballimin e situatës janë angazhuar të gjitha kapacitetet e MZSH Pukë, me të gjithë efektivin dhe tre automjete zjarrfikëse.
Në ndihmë kanë ardhur edhe forca dhe mjete nga Bashkia Fushë-Arrëz, MZSH Kukës dhe MZSH Rrëshen.
Gjatë operacionit janë angazhuar edhe banorët e zonës, ndërsa në total kanë marrë pjesë rreth 100 forca. Për shuarjen e flakëve është ndërhyrë edhe nga ajri.
Vija e zjarrit ka arritur në rreth 5 kilometra, por pas disa orësh përpjekjesh, situata tashmë është vënë plotësisht nën kontroll dhe nuk paraqet më rrezik për banesat.
Aktualisht situata në Gojan të Vogël paraqitet e qetë, ndërsa autoritetet vijojnë monitorimin e zonës. Shkaqet e rikthimit të zjarrit dhe të gjithë rrethanat e ngjarjes po hetohen.
