Kryeministri Edi Rama ka dërguar drejtoreshën e MIA-s, Manjola Hasa, para Kryeministrisë për të përcjellë ftesën e qeverisë për dialog me studentët dhe qytetarët që prej ditësh protestojnë në Tiranë.
Por prania e saj nuk është pritur mirë nga protestuesit. Studentë dhe akademikë e kanë kundërshtuar, duke i kërkuar të largohet dhe duke përsëritur thirrjet për dorëheqjen e kryeministrit Edi Rama.
Manjola Hasa u shpreh se nuk kishte mbërritur për të bërë deklarata politike apo për të komentuar reagimet e studentëve dhe qytetarëve, por për të përcjellë ftesën e hapur të kryeministrit për dialog.
“Nuk jam këtu për të bërë deklarata politike. As për reagimet e studentëve, apo çdo qytetari që të protestojë. Jam këtu nga ftesa e hapur e kryeministrit për dialog. Kush është i interesuar për dialog… Nëse ka studentë, qytetarë që të dialogojnë, për këtë jam këtu. Nuk jam këtu të flas në cilësinë e vendimeve. Jam në emër të qeverisë shqiptare, për ftesën për dialog.”, tha Hasa.
