Qytetarët e mbledhur në protestën e zhvilluar para Kryeministrisë kanë bërë publike pesë kërkesa që, sipas tyre, synojnë mbrojtjen e interesit kombëtar dhe të pasurive publike të vendit.
Në deklaratën e tyre, protestuesit kërkojnë:
-
Dorëheqjen e të gjithë qeverisë;
-
Shfuqizimin e statusit që lidhet me investimet strategjike;
-
Shfuqizimin e “Paketës së Maleve”;
-
Anulimin e ndryshimeve në ligjin për zonat e mbrojtura;
-
Anulimin e ndryshimeve në ligjin për trashëgiminë kulturore.
Protestuesit theksuan se këto janë kërkesa që lidhen me mbrojtjen e interesit kombëtar dhe se nuk pranojnë negociata për pasuritë e shqiptarëve.
“Nuk pranojmë negociata mbi pasuritë e shqiptarëve. I bëjmë thirrje çdo shqiptari të bashkohet në këtë përpjekje qytetare”, u shprehën ata.
Qytetarët kërkuan anulimin e projekteve që kundërshtojnë, duke deklaruar se “koha për veprim ka ardhur” dhe se “Shqipëria është vetëm e shqiptarëve”.
