Avokati Stefan Topalli, anëtar i Këshillit të Përgjithshëm të Dhomës Kombëtare të Avokatisë dhe anëtar i Union des Avocats Européens (UAE), ka kundërshtuar ndalimin e përdorimit të telefonave celularë në ambientet e GJKKO-së.
Përmes një deklarate, Topalli thotë se, në emër të tij dhe të avokatëve kryesisht, refuzon të jetë pjesë e proceseve në GJKKO, në të gjitha shkallët, duke argumentuar se vendimi cenon parimin e barazisë proceduriale.
Sipas tij, nuk është e drejtë që avokatëve t’u ndalohet përdorimi i telefonave, ndërkohë që gjyqtarët dhe prokurorët lejohen t’i përdorin ato gjatë qëndrimit në sallën e gjyqit.
“Nëse gjyqtari, trupa përbërëse dhe prokurori rrinë me telefona, atëherë pse duhet avokatëve t’u ndalohet kjo?”, shprehet Topalli.
Ai bën me dije se Këshilli i Përgjithshëm i Dhomës Kombëtare të Avokatisë, të cilin e cilëson si organin më të rëndësishëm vendimmarrës të avokatisë, do të mblidhet të martën, më 8 shtator 2026, ku pritet të marrë një vendim lidhur me këtë çështje.
Topalli paralajmëron se vendimi do të jetë kundër masës së ndalimit, duke e lidhur qëndrimin e tij me garantimin e të drejtave të avokatëve dhe të procesit të rregullt ligjor.
“S’ka drejtësi pa avokati, këtë duhet ta keni të qartë”, përfundon ai.
