Marshimi ka filluar tani nga Sheshi “Skënderbej” drejt Kryeministrisë, për të 16-tën ditë proteste kundër qeverisë.
Ngjashëm me protestat e kaluara, protestuesit do të ndalojnë para godinës së Kryeministrisë, ku planifikohen fjalime nga organizatorët dhe pjesëmarrësit.
Pasi të përfundojnë fjalimet, qytetarët pritet të vazhdojnë marshimin në disa nga rrugët kryesore të kryeqytetit.
Gjatë fjalës së tyre me megafon, organizatorët i kërkuan protestuesve të ruajnë qetësinë dhe unitetin gjatë marshimit, duke theksuar se incidentet e natës së kaluar nuk duhet të përsëriten.
“Marshimi është organizuar nga vetë të rinjtë, por nga sot do të kujdesemi më shumë për mbarëvajtjen e tij, në mënyrë që të shmangen incidentet e mbrëmshme. Nuk do të ketë më marshim jashtë Unazës,” tha aktivisti Kola.
Një tjetër organizator gjithashtu u siguroi pjesëmarrësve se ngjarjet e natës së kaluar nuk do të përsëriten.
“Ajo që ndodhi mbrëmë nuk do të përsëritet,” u shpreh ai.
Kujtojmë se mbrëmë, nga bulevardi “Dëshmorët e Kombit”, protestuesit marshuan nën thirrje dhe mbërritën te mbikalimi i Kasharit, duke u nisur më pas drejt rrugës që çon në Rinas.
Dalja nga qyteti i Tiranës u bllokua, me rrugën dytësore si të vetmin aks për lëvizje. Edhe rruga hyrëse drejt kryeqytetit përjetoi trafik të rënduar.
Policia ndërhyri duke e bllokuar marshimin e protestuesve dhe duke mos lejuar kalimin deri në aeroport.
