Pas një prej sfidave më të mëdha të karrierës së tij, boksieri shqiptar Kristian Prenga ka lënë për pak kohë ringun dhe ka zgjedhur bregdetin e jugut për të pushuar.
Prenga ka publikuar në rrjetet sociale disa momente nga ditët e tij të relaksit në Shqipëri, duke treguar se pas një periudhe të ngarkuar me stërvitje dhe përgatitje, tashmë po shijon detin dhe atmosferën e bregdetit shqiptar.
“Bregdeti shqiptar. Relaksohuni dhe rimbushni”, shkruan ai në postimin e tij.
Pushimet vijnë pak javë pas duelit të shumëpërfolur me Anthony Joshua-n.
Më 25 korrik, në Jeddah të Arabisë Saudite, Prenga u përball me ish-kampionin e botës në peshat e rënda, në një ndeshje që nisi shumë mirë për shqiptarin.
Në raundin e parë, Prenga arriti ta rrëzojë dy herë Joshua-n, duke dhënë përshtypjen se mund të shkaktonte një nga surprizat më të mëdha në boks.
Britaniku megjithatë u rikthye në këmbë dhe e mbylli raundin.
Në raundin e dytë, situata ndryshoi. Joshua mori kontrollin e përballjes, goditi disa herë Prengën dhe arbitri vendosi të ndërpresë duelin, duke i dhënë fitoren britanikut me nokaut teknik.
Rezultati solli edhe reagime të shumta mes tifozëve shqiptarë dhe ndjekësve të boksit.
Ndërsa shumë e vlerësuan Prengën për mënyrën se si e nisi duelin dhe për dy rrëzimet e Joshua-s, pati edhe kritika ndaj tij, kryesisht për faktin se nuk arriti ta shfrytëzonte avantazhin e krijuar në raundin e parë.
Përtej rezultatit, përballja me Joshua-n përfaqësoi një nga momentet më të rëndësishme të karrierës së Prengës dhe e vendosi emrin e tij përballë një prej figurave më të njohura të peshave të rënda në arenën ndërkombëtare.
Sipas raportimeve dhe vlerësimeve të bëra pas përballjes, të ardhurat e Prengës nga kjo ndeshje mendohet të jenë mbi 3 milionë euro, një shifër që do ta kthente duelin me Joshua-n edhe në një nga përballjet më fitimprurëse të karrierës së tij.
Tani, boksieri nga Oroshi duket se ka zgjedhur të lërë pas për pak kohë emocionet dhe debatet e ringut.
Fotot nga jugu i Shqipërisë tregojnë Prengën duke shijuar bregdetin, ndërsa mesazhi i tij është i qartë, pas një prej sfidave më të forta të karrierës, është koha për të pushuar, për t’u rikuperuar dhe për të rimbushur energjitë për ndeshjet që e presin në të ardhmen.
