Pesë persona janë gjetur të gjallë pasi mbetën të bllokuar për një javë brenda një shpelle të përmbytur në Laos, pas reshjeve të dendura të shiut dhe rrëshqitjeve të dheut.
Sipas ekipeve të shpëtimit nga Laos, dy persona të tjerë që ndodheshin me ta rezultojnë ende të zhdukur, raporton BBC.
Të shtatë personat ishin banorë nga provinca qendrore Xaysomboun, të cilët kishin hyrë në shpellë të mërkurën e kaluar në kërkim të depozitave të arit dhe kafshëve të egra. Ata nuk mundën të dilnin pasi hyrja e shpellës u bllokua nga përmbytjet dhe rrëshqitjet e dheut.
Pamjet e publikuara nga ekipet e shpëtimit tregojnë zhytësit duke kaluar nëpër korridore të ngushta dhe me baltë, pothuajse të mbushura plotësisht me ujë.
Bounkham Luanglath nga organizata “Rescue Volunteer for People” deklaroi për Associated Press se kërkimet për dy personat e zhdukur do të vazhdojnë.
Sipas shpëtimtarëve, sistemi i shpellës shtrihet thellë nën tokë dhe është jashtëzakonisht i ngushtë, me disa dhoma që kanë vetëm rreth 50 centimetra gjerësi.
“Gjetëm pesë persona të gjallë dhe të gjithë janë në gjendje të sigurt”, njoftoi organizata në një postim në rrjetet sociale. “Dy persona të tjerë vazhdojnë të kërkohen.”.
Shpëtimtari tajlandez Kengkach Bangkawong deklaroi në Facebook se banorët u gjetën rreth orës 16:30.
Ndërkohë, zhytësi specialist nga Finland, Mikko Paasi, tha më herët se ekipet e shpëtimit u përballën me kalime të ngushta, ujëra të përmbytura, rrezik shembjesh dhe ajër të ndotur brenda asaj që ai e përshkroi si një “minierë ari të braktisur”.
Ai vlerësoi se grupi ishte bllokuar rreth 300 metra larg daljes së shpellës.
Shpella ndodhet rreth 120 kilometra në veri të kryeqytetit Vientiane.
Një nga shpëtimtarët vendas, i identifikuar si Baeng për arsye sigurie, deklaroi për Agence France-Presse se zona nuk është pronë e askujt dhe banorët lokalë hyjnë shpesh aty për të kërkuar ushqim ose për të hapur gropa në kërkim të mineraleve.
Kengkach Bangkawong ishte gjithashtu pjesë e ekipit që shpëtoi 12 djemtë tajlandezë dhe trajnerin e tyre të futbollit, të cilët mbetën të bllokuar për dy javë në një shpellë të përmbytur në provincën Chiang Rai në vitin 2018.
Operacioni i jashtëzakonshëm i shpëtimit përfshiu më shumë se 10 mijë ekspertë nga e gjithë bota dhe tërhoqi vëmendje globale. Ngjarja u bë më pas subjekt i disa filmave dhe dokumentarëve, përfshirë Thirteen Lives dhe dokumentarin The Rescue.
