Një tentativë për të përfituar 100 mijë euro përmes mashtrimit online është goditur nga Policia e Tiranës.
Në kuadër të operacionit të koduar “Seen”, në pranga kanë rënë dy të rinj, Edison Korra, 24 vjeç dhe Orest Balla, 23 vjeç. Sipas policisë, ata dyshohet se mashtruan një 64-vjeçar duke përdorur një profil të rremë në rrjetet sociale, të krijuar me të dhënat e një personi të njohur të tij.
Dy të rinjtë u kapën në flagrancë në momentin kur po merrnin shumën prej 100 mijë eurosh nga 64-vjeçari. Hetimet vijojnë për identifikimin e personave të tjerë që mund të jenë përfshirë në skemën e mashtrimit.
Njoftimi i policisë:
Tiranë/Finalizohet operacioni i koduar “Seen”.
Goditet një tjetër tentativë për të përfituar shuma të mëdha parash, nëpërmjet mashtrimit në platforma komunikimi online.
Mashtruan një 64-vjeçar, nëpërmjet një profili të rremë me kredencialet e një të njohuri të tij, për t’i marrë 100 000 euro, arrestohen në flagrancë, kur po merrnin paratë, 2 shtetas.
Specialistët e Seksionit për Hetimin e Krimeve Ekonomiko-Financiare, në bashkëpunim me Forcën e Posaçme “Operacionale”, si rezultat i administrimit të menjëhershëm të kallëzimit të një 64-vjeçari, mbi dyshime për mashtrim në platformë komunikimi online, finalizuan operacionin e koduar “Seen”, gjatë të cilit u kapën në flagrancë, kur po i merrnin 100 000 euro kallëzuesit, dhe u vunë në pranga shtetasit E. K., 24 vjeç dhe O. B., 23 vjeç.
Nga hetimet e kryera me metoda speciale, me qëllim zbardhjen e plotë të autorësisë dhe rrethanave të këtij rasti, dyshohet se këta shtetas kanë komunikuar me 64-vjeçarin, nëpërmjet një profili të rremë në një rrjet social.
Profili ishte aktivizuar me të dhënat e një të njohuri të 64-vjeçarit, me qëllim mashtrimin e tij.
Hetimet vijojnë me qëllim identifikimin dhe nxjerrjen përpara përgjegjësisë penale të shtetasve të tjerë që mund të jenë përfshirë në këtë rast.
Materialet procedurale iu referuan Prokurorisë, për veprime të mëtejshme.
