Një 19-vjeçar, punonjës i Patrullës së Policisë, është dhunuar mbrëmjen e kaluar në Krujë, ndërsa në momentin e ngjarjes ka qenë jashtë shërbimit.
Sipas të dhënave, i riu është goditur me sende të forta dhe shkop bejsbolli. Autorë të dyshuar të ngjarjes janë dy vëllezër, familjarë të një vajze me të cilën 19-vjeçari kishte komunikuar në rrjetin social Instagram.
Nga hetimet paraprake dyshohet se familjarët e vajzës kishin mësuar për komunikimin, ndërsa vëllai i saj nuk e ka pranuar këtë fakt. Vajza me të cilën komunikonte punonjësi i policisë është nën moshën 18 vjeç.
Pas kallëzimit të 19-vjeçarit, hetuesit kanë nisur verifikimet për identifikimin dhe kapjen e personave të dyshuar. Këqyrja e kamerave të sigurisë ka ndihmuar në identifikimin e automjetit me të cilin dyshohet se janë larguar autorët.
Dy vëllezërit janë shpallur në kërkim, ndërsa hetimet vijojnë për zbardhjen e plotë të rrethanave të ngjarjes dhe dokumentimin e përgjegjësisë së personave të dyshuar.
