Përfaqësuesi i Partisë Demokratike në Shkodër, Kliti Hoti, ka reaguar pas publikimit të të dhënave të Agjencisë Evropiane të Mjedisit (EEA) mbi cilësinë e ujërave në plazhet shqiptare, duke ngritur shqetësimin për situatën në Velipojë.
Sipas Hotit, shifrat zyrtare tregojnë se dy nga pikat kryesore të monitorimit në plazhin e Velipojës kanë zbritur nga niveli “Excellent”, që mbanin deri në vitin 2022, në kategorinë “Sufficient”, niveli minimal i pranueshëm sipas standardeve europiane.
Në reagimin e tij, ai akuzon institucionet për mungesë investimesh në infrastrukturën e kanalizimeve dhe trajtimin e ujërave të zeza, duke e lidhur përkeqësimin e treguesve me rritjen e fluksit turistik dhe mungesën e menaxhimit të duhur.
“Suksesi imagjinar për turizmin dhe plazhet e pastra është rrëzuar nga shifrat zyrtare. Velipoja ka kaluar nga vlerësimi maksimal në kufijtë minimalë të higjienës, duke ngritur pikëpyetje serioze mbi menaxhimin e zonës turistike”, shprehet Hoti.
Ai thekson se zhvillimi i turizmit nuk mund të mbështetet vetëm në promovim, por kërkon investime konkrete në infrastrukturën mjedisore, ndërsa bën thirrje për një qasje më të përgjegjshme në mbrojtjen e pasurive natyrore të Shkodrës.
