Këshilltari bashkiak i Shkodrës, Kliti Hoti, ka reaguar pas dorëheqjes së Tonin Gjuraj, duke e cilësuar atë një humbje të madhe për Universitetin e Shkodrës dhe një zhvillim që duhet të shqetësojë çdo shkodran.
Në reagimin e tij, Hoti shprehet se Universiteti i Shkodrës është një nga institucionet më të rëndësishme të vendit, që ka formuar breza të tërë profesionistësh, mësuesish dhe studiuesish, ndërsa ngre shqetësimin për klimën e debateve dhe përplasjeve që, sipas tij, prej kohësh kanë shoqëruar jetën akademike të institucionit.
Ai thekson se energjitë duhet të përqendrohen te cilësia e arsimit, kërkimi shkencor dhe mbështetja e studentëve, duke paralajmëruar se një qytet që nuk respekton universitetin e vet rrezikon të humbasë elitën akademike dhe aftësinë për të prodhuar zhvillim.
Në fund të reagimit, Hoti ngre edhe një pyetje të fortë për realitetin e qytetit: “Pse në Shkodër po largohen gjithmonë ata që përpiqen të ndërtojnë, ndërsa gjithnjë e më shumë hapësirë u lihet atyre që e kanë sjellë qytetin në këtë gjendje?”
