Për herë të parë, Shkodra priti rezidencën ndërkombëtare të kinemasë “Kino on the Road”, duke sjellë së bashku për dhjetë ditë rresht 16 kineastë të ardhur nga vende të ndryshme. Gjatë këtij programi intensiv artistik, pjesëmarrësit krijuan nëntë filma të shkurtër, të cilët u frymëzuan nga peizazhi dhe jeta e qytetit.
Kinema “Republika” hapi dyert për publikun me një mbrëmje të dedikuar projeksionesh, ku u shfaqën të gjitha filmat e realizuar gjatë rezidencës. Në këtë aktivitet morën pjesë vetë regjisorët dhe aktorët e përfshirë në projektet filmike.
Ky projekt u organizua përmes bashkëpunimit ndërmjet Teatrit “Migjeni” të Shkodrës dhe qendrës “Slow Mill” nga Milano, me synimin për të ndërtuar ura komunikimi dhe bashkëpunimi mes artistëve të rinj e profesionistëve të kinemasë.
“Kino on the Road” i mundësoi kineastëve një eksperiencë të pasur profesionale, duke theksuar rëndësinë e shkëmbimit të njohurive, punës së përbashkët ndërkombëtare dhe të mësuarit përmes veprimit praktik në vend.
