Ja’Kobe Tharp, një atlet amerikan, ka bërë histori në botën e atletikës. Në moshën vetëm 20-vjeçare, ai vendosi një rekord të ri në garën e 110 metrave me pengesa, duke regjistruar një kohë të jashtëzakonshme prej 12 sekondash e 75 të qindat.
Kjo arritje bëhet edhe më e veçantë, duke qenë se u shënua gjatë kampionatit amerikan të universiteteve, që u mbajt në Oregon.
Tharp e theu rekordin e mëparshëm, që ishte vendosur nga Arien Merrit, një tjetër atlet amerikan dhe kampion olimpik. Merrit kishte përfunduar garën me një kohë prej 12.80 të qindat në kampionatin botëror të atletikës në Bruksel, në vitin 2012.
Përveç kësaj, atleti i ri po ashtu theu rekordin e kampionateve të universiteteve në Shtetet e Bashkuara, i cili ishte vendosur në vitin 2019. Në historinë e atletikës, Tharp i bashkohet Duajt Stones, një figurë e njohur për vendosjen e një rekordi botëror në garat e universiteteve në kërcim së larti, në vitin 1976.
Ja’Kobe Tharp, student në Universitetin e Auburn, kishte bërë debutimin e tij profesional një vit më parë në Botërorin e Tokios, ku përfundoi i gjashti në garën e 110 metrave me pengesa. Megjithatë, pas këtij rekordi që arriti tani, e ardhmja e tij duket e ndritur dhe plot shpresë.
