Irani ka kryer të paktën 900 ekzekutime që nga fillimi i vitit 2026, përfshirë 28 gjatë muajit gusht, sipas të dhënave nga Qendra Abdorrahman Boroumand për të Drejtat e Njeriut në Iran, me seli në Uashington.
Sipas këtij raporti, janë dokumentuar 901 ekzekutime mes janarit dhe korrikut, duke nënvizuar një rritje të ndjeshme të përdorimit të dënimit me vdekje veçanërisht në çështjet që lidhen me sigurinë kombëtare, krimet që kanë të bëjnë me drogën si dhe dënime që përfshijnë anëtarë të pakicave etnike.
Gjatë periudhës shtatëmujore, të paktën 56 veta u ekzekutuan për akuza politike ose të sigurisë kombëtare, ndërsa 29 prej tyre kishin lidhje me protesta publike, 13 persona u akuzuan për spiunazh dhe 14 të tjerë u dënuan për akuza të ndryshme që lidhen me sigurinë. Ekzekutimet për veprat që kanë të bëjnë me drogën përbënin të paktën 268 raste.
Të dhënat sugjerojnë gjithashtu një ndikim të tepruar ndaj pakicave etnike dhe grupeve të tjera të cenueshme të shoqërisë.
Në intervalin janar-korrik janë evidentuar të paktën 98 të ekzekutuar nga radhët e pakicave etnike: 40 balukë, 29 kurdë, 21 afganë, gjashtë arabë, si dhe nga një vetë turk dhe turkman.
Gjithashtu, raporti thekson se janë ekzekutuar 16 gra dhe dy persona të cilët ishin nën moshën 18 vjeç në momentin kur kanë kryer veprat e supozuara penale. Pesë nga dënimet ishin të zbatuara publikisht.
Shumica e ekzekutimeve janë regjistruar në disa provinca kryesore, me Razavi Khorasan që kryeson me 95 ekzekutime, ndjekur nga Isfahan me 71 raste dhe Alborz me 57.
Sipas OJQ-ve, gjatë vitit 2025 Irani ekzekutoi të paktën 1,639 individë, që përfaqëson një rritje prej 68% në krahasim me një vit më parë.
Këto të dhëna të reja vijnë mes shqetësimeve në rritje në komunitetin ndërkombëtar për shkallën e ekzekutimeve në Iran.
Raporti i Sekretarit të Përgjithshëm të Kombeve të Bashkuara, Antonio Guterres, drejtuar Asamblesë së Përgjithshme, përmend se “të paktën 975 persona thuhet se u ekzekutuan në Iran në vitin 2024”, duke shënuar një rritje prej 17% nga viti paraardhës dhe shifrën më të lartë vjetore që nga viti 2015.
Sipas të njëjtit raport, në gjysmën e parë të vitit 2025 u konfirmua një rritje e mëtejshme, me të paktën 612 ekzekutime të regjistruara nga janari deri në qershor, që përbën një rritje prej 119% në krahasim me të njëjtën periudhë të vitit 2024.
Organizata e Kombeve të Bashkuara ka ngritur në mënyrë të vazhdueshme shqetësime për aplikimin e dënimit me vdekje në Iran, veçanërisht në rastet që përfshijnë krime të lidhura me drogën, akuza për siguri kombëtare apo pakica etnike, si dhe për proceset gjyqësore të padrejta dhe përdorimin e rrëfimeve që lidhen me torturën.
