Një infermiere në Spitalin “Kryqi i Kuq” në Greqi është sulmuar nga një pacient gjatë orëve të para të së shtunës, teksa ishte në detyrë në Urgjencë.
Ngjarja ndodhi kur infermierja, e zakonshme në Njësinë e Kujdesit Intensiv, ishte transferuar për turnin e urgjencës. Sipas Michalis Giannakou, kryetar i POEDIN, incidenti filloi kur pacienti, i shtrirë në barelë, u informua nga personeli mjekësor që të priste radhën pasi prioritet u jepej të sëmurëve në gjendje të rëndë.
Situata u agravua dhe pacienti dyshohet se ka ushtruar dhunë ndaj infermieres. Giannakou deklaroi se ajo është goditur disa herë nga pacienti dhe vetëm ndërhyrja e stafit ka bërë të mundur përfundimin e incidentit.
Kryetari i sindikatës së shëndetësisë ka shfaqur pakënaqësi për mënyrën si reagoi siguria e spitalit. Sipas tij, edhe pse dy roje sigurie ishin të pranishëm në vendngjarje, ata nuk ndërhynë pavarësisht thirrjeve për ndihmë.
Giannakou thekson se rojet u arsyetuan me rregulla që ndalojnë kontaktin fizik me pacientët. Ai shprehu shqetësimin për mbrojtjen e personelit shëndetësor dhe kërkoi marrjen e masave më të forta për sigurinë e stafit në ambjentet e urgjencës.
