Një vit më parë janë publikuar pamje nga burimi i Rrjollit në Kokpapaj, një nga burimet kryesore të furnizimit me ujë për Malësinë e Madhe, nga i cili përfitojnë rreth 80% e banorëve të zonës.
Sipas informacioneve, uji grumbullohet në kanalin kryesor përmes tubave prej eterniti, të vendosur që në kohën e ndërtimit të veprës. Shqetësimi lidhet me faktin se eterniti konsiderohet material me rrezik për shëndetin dhe përdorimi i tij është ndaluar në vendet e Bashkimit Europian, por edhe në Shqipëri.
Ekspertët kanë ngritur vazhdimisht shqetësimin se ekspozimi i zgjatur ndaj këtij materiali mund të ketë pasoja serioze për shëndetin e njerëzve.
Mbetet e paqartë nëse institucionet përgjegjëse kanë ndërmarrë ndonjë hap konkret për zëvendësimin e këtyre tubacioneve dhe garantimin e sigurisë së ujit të pijshëm për banorët.
Burimi: Zani i Veriut
