Deputetja Marjana Koçeku ka ngritur alarmin për atë që e cilëson si një kërcënim ndaj lumit të Currajve në Nikaj-Mërtur, duke bërë thirrje për reagim të menjëhershëm nga banorët dhe organizatat mjedisore.
Përmes një reagimi publik, Koçeku shprehet se ka mësuar se lumi po preket nga betonizimi dhe ndërtimi i disa digave, ndërhyrje që sipas saj nuk duhet të lejohen.
“Sot mora vesh që lumi i Currajve në Nikaj-Mërtur po cënohet nga betonizimi dhe ndërtimi i disa digave. Kjo nuk duhet me u leju. Banorët e zonës duhet ta mbrojnë para se të jetë vonë. Çdo ndërhyrje në atë lumë të egër është e pajustifikueshme”, shkruan deputetja.
Ajo u bën thirrje organizatave mjedisore, banorëve të zonës dhe aktivistëve të angazhohen për mbrojtjen e lumit të Currajve, duke e cilësuar atë një pasuri të çmuar natyrore.
“Nuk ka pasur ndonjëherë kohë më të mirë për të vepruar”, përfundon reagimin e saj Marjana Koçeku.
