Një aksident i rëndë rrugor u shënua këtë mesditë në aksin kombëtar Peqin-Elbasan, ku si pasojë u plagos drejtuesi i njërit prej makinave të përfshira në ngjarje.
Incidenti ndodhi rreth orës së drekës në fshatin Lazarej, Njësia Administrative Përparim, brenda territorit të Bashkisë Peqin. Përplasja ishte e fuqishme, duke shkaktuar dëmtime të rënda në pjesën e përparme të njërës nga automjetet, e cila mbeti pothuajse e shkatërruar. Të dhënat e para nga vendngjarja tregojnë se drejtuesi i një prej automjeteve është lënduar dhe është dërguar menjëherë për trajtim mjekësor. Nuk ka ende të dhëna për gjendjen e tij.
Policia rrugore mbërriti në vendngjarje dhe po kryen veprimet e nevojshme për të zbardhur rrethanat e aksidentit.
Ende nuk është publikuar një informacion zyrtar mbi shkaqet e përplasjes, numrin e saktë të personave të prekur apo pasoja të tjera të mundshme. Hetimet janë në vijim për të sqaruar dinamikën e plotë të aksidentit.
