Deputeti i Partisë Demokratike, Saimir Korreshi, ka lëshuar një thirrje të fortë përmes një reagimi në rrjetet sociale, drejtuar mjekëve, infermierëve dhe gjithë personelit të Spitalit të Lushnjes.
Korreshi ka denoncuar një tentativë të drejtuesit të institucionit, i cili sipas tij po u servire bluzave të bardha një peticion ku pretendohet se çdo gjë në spital “shkon vaj”. Deputeti demokrat u ka kërkuar mjekëve që të mos bëhen pjesë e kësaj propagande dhe të refuzojnë firmosjen e asaj që ai e quan një gënjeshtër të pastër, pasi qytetarët e Lushnjes dhe Divjakës nuk do t’ua falin.
Në postimin e tij, Korreshi thekson se Lushnja meriton një spital model me status Rajonal, ashtu siç ka qenë dikur, ku të mos mungojnë aparaturat dhe mjekimet bazë për qytetarët që paguajnë taksa si gjithë të tjerët.
“REFUZONI farsën (PETICIONIN) që po ju servir drejtuesi i institucionit se çdo gjë në atë spital shkon vaj. Lushnjarët kanë sy e nuk kanë për t’jua falur asnjërit që për hir të qenurit shef pavioni apo kryeinfermier do të firmosin një gënjeshtër të tillë që ju në vetë të parë më mirë se çdokush e dini! Mjekë të nderuar ju jeni ajka e shoqërisë, jo rrogoza patronazhistësh! Respekti ndaj vetes tuaj është respekt për qytetarët e Lushnjes,” shkruan Korreshi.
Në mbyllje të reagimit të tij, deputeti i PD-së ka bërë një ftesë të hapur për të gjithë banorët e zonës, pa asnjë ngjyrim politik, që të bëhen gati për të dalë në protestë për të kërkuar një spital modern, duke paralajmëruar se dita dhe ora e tubimit do të njoftohen shumë shpejt.
