Sot, gjatë faljes së Namazit të Bajramit, Myftiu i Shkodrës, Muhamed Sytari riktheu në vëmendje një nga çështjet më të debatueshme në qytet: vjedhjen e tokës së vakëfit dhe ndërtimin e kullës shumëkatëshe në zemër të Shkodrës.
Në mesazhin e tij para besimtarëve, ai ngriti shqetësimin për atë që e cilësoi si një padrejtësi të rëndë ndaj pronave të komunitetit fetar, duke theksuar se heshtja përballë këtyre zhvillimeve nuk mund të vazhdojë.
Sytari u ndal te transformimi urban i qytetit, duke lënë të kuptohet se interesa të caktuara kanë cenuar jo vetëm trashëgiminë dhe identitetin e Shkodrës, por edhe pronat që historikisht kanë qenë në shërbim të komunitetit.
