Një tjetër futbollist shkodran po bën hapin e madh në karrierë. Erald Maksuti do ta vazhdojë aventurën e tij në futbollin rus, pasi Flamurtari ka pranuar ofertën e Akhmat Groznit për transferimin e sulmuesit 22-vjeçar.
Shkodrani Maksuti, i cili hapat e parë në futboll i hodhi në fshatin e Berdicës dhe më pas u formua me akademinë “Brians”, shkëlqeu këtë sezon me Flamurtarin në elitën e futbollit shqiptar. Madje, para se të transferohej te skuadra vlonjate, emri i tij iu propozua edhe Vllaznisë, por kuqeblutë nuk vendosën ta afronin në ekip.
Edhe pse Flamurtari nuk arriti të mbijetojë në Superiore, Maksuti zhvilloi një sezon shumë të mirë, duke realizuar 12 gola dhe 3 asiste, teksa u kthye në një nga lojtarët më të spikatur të kampionatit.
Sipas “Panorama Sport”, marrëveshja mes Flamurtarit dhe Akhmat Groznit kap vlerën e 700 mijë eurove, një rekord për klubin vlonjat në periudhën e administruar nga Sinan Idrizi.
Maksuti ishte transferuar më herët nga Apolonia te Flamurtari për 150 mijë euro.
