Kryebashkiaku i Tiranës, Erion Veliaj, ka reaguar pas transferimit nga paraburgimi i Durrësit drejt burgut të Fierit, duke e cilësuar këtë veprim si politik dhe të kryer pa pëlqimin e tij.
Përmes një postimi në rrjetet sociale, Veliaj pretendon se, pavarësisht kërkesave të tij dhe të avokatit për t’u njohur me aktin që urdhëron transferimin dhe arsyet ligjore të tij, dokumenti nuk u është vënë në dispozicion. Sipas kryebashkiakut, kjo mënyrë veprimi cenon të drejtat e tij dhe përbën, siç shprehet ai, një “rrëmbim policor”.
Veliaj i ka kërkuar ministrit të Drejtësisë, Toni Gogu, Avokatit të Popullit, Endri Shabani, si dhe Komitetit Shqiptar të Helsinkit, të ndërhyjnë urgjentisht për të verifikuar arsyet dhe ligjshmërinë e transferimit.
Në reagimin e tij, kryebashkiaku thekson se nuk ka dhënë pëlqimin për këtë lëvizje dhe kundërshton mënyrën se si është realizuar, duke kërkuar transparencë dhe respektim të të drejtave të tij ligjore.
